Defunkt taldea funtsezkoa da NGSamples unibertsoan. Oraingo honetan, bateria sarkor horri erreparatu behar diogu, etengabe «ohh baby!» oihuka dezakegun bitartean (ad libitum, otoi!). Atal batzuk zoragarriak dira; 6 minutu motz egingo zaizkizu.
Hain zuzen ere, erritmo sakon hori erabili zuten negutarrek aizkorada etengabeak bailiran…gozatu, hauspoa bete arren!
Imajina ezazu 80. hamarkadako Kaki, Laurie Andersonen zuzeneko batean erabat txunditurik, amerikarrak ahotik laser izpi koloretsuak botatzen zituen bitartean abesten zuela ikusten. Izan ere, audioa entzunez bakarrik antzeman daiteke, bai, ez dela nolanahiko artelana aditzen dena. Pentsa nolakoa litzatekeen performance osoa garai hartan!
Urte batzuk iragan ostean, bizipen hari keinu ezin hobea egingo zion Kakik 1991. urtean abestien arteko isilunea zer zen ez zekien Gure Jarrera diskoaren bidez. Kantaren amaieran duzue samplea entzungai.
Aiako Txikito mila dantzen lurraldean dabil, hiri gerrilaren dantza barne. Adi intro errepikatuaren ondoren (3. seg) eta piezaren bigarren zatian (19.etik aurrera) itzultzen den perkusioari.
Guda dantza lotu ala askatua den ez dakigu baina 40. segundoko bateria soloak begiak ireki dizkigu. Hirurak. Eskerrik asko, Steve!
Sanple hau ere 1988 urte emankorrekoa dugu. Ez dugu ahaztu behar urte hori hartzen dela Estatu Batuetako Hip Hoparen eskola zaharraren urrezko garaitzat, orduan argitaratu baitziren diskarik salduenak. Run-DMC taldearen kanta honetan ia uneoro entzuten dugun sanplea, baina 2:33tik 2:37ra doan denbora tartea da aukerarik garbiena eta hori baliatuko zuten euskaldunek beraien kantarako:
Negu Gorriakenean 30. segundutik 34.era entzuten dugun berbera, alegia:
Negu Gorriaken BSO kantan inor sanpleatua izan bazen, hori LKJ dugu. Peachi eskainitako reggeaz gain, seme batek amari kartzelatik idatzitako gutuna ardatz duen Sonny’s Lettah kantatik honako esaldia erabili zuten (2. minutua pasa berritan):
“Mama, mek i tell you wa dem do to Jim? Mama, mek i tell you wa dem do to ‘im?”
Negu Gorriaken kantan ia abestiaren une berean daude sanpleatuak Sonnyk amari egiten dizkion galderak (2 min. 09 seg.)
Aiako Txikito osoki maisulan bat den arren, oraingoan sarrerari erreparatuko diogu bereziki, introa berezia baitauka.
Izan ere, Steve Cropper bera dugu intro mitikoaren atzean. Gitarrajole funtsezkoa, Stax zigiluari dagokionez. Blues Brothers, Otis Redding edota Ringo Starr bidaide izan ditu bere karrera luze bezain oparoan. Kasu honetan introa motelago doa; hala ere, identifikagarria da oso.
Ferminek bere taldekideak lanera bidali aurretik bada NWA taldearen sanple bat Sam Cookeren abestia eteteko erabili zutena “wait a minute, wait a minute” batekin. Ahotsa, Ice Cube handiarena da (3 min 55 seg):
Itzel geratu zitzaien, 23. segunduan, ezta?
“NG bada”ren hasiera mitikoa da. Hain zuzen ere, ibilbide oso luzea izan zuen Gladys Knight & The Pips taldearen kanta baten berbera: Midnight Train to Georgia. Bertan, gauzak espero bezala atera ez eta bere erroetara bueltatzen den pertsona baten istorioaz abesten zuten:
Negu Gorriak taldeak hasiera hori bikain txertatu zuen bere instrumentalean:
Funk musika sorburu oraingoan ere. Sly & The Family Stone talde mitikoak aurrera doan Negu Gorriak taldeari konpainia egiten dio ahotsen erritmo hipnotiko batekin. Haien “Dance to the music” entzunez gero, sanpleatua izan zen zatia erraz hauteman liteke (15. segundutik aurrera adibidez):
Ez duzu argi ikusten oraindik? Tira, entzun “NG badoa” eta ziur audio lagina topatuko duzula!
“1,2,3…kick it!” zioen NWAko The D.O.C. kideak abesti hasieran, gogoratzen?
“Nire bizitza osoa”ren 23. segunduan txertatua entzun dezakegu, juxtu Ferminen aginduen ondoren: