Urteekin Negu Gorriak taldekoek munduan zehar kontaktu sarea ehundu zuten, euren lan independente eta eredugarriaren emaitzaren ondorioz. Lanen banaketak gora egin zuen, mundu zabalean taldearen aldeko interesa handituz joan zen neurrian. Diskoekin munduko bazter ia guztietara ailegatu ziren. Mano Negrak Japonian zuen kontaktuen bitartez, 1992an hara joaten saiatu ziren baina ez zen gauzatu, eta ez ziren inoiz Japoniara joan. Hala ere, Quattro label zigilu asiarra arduratu zen euren musika eta jarrera Japoniaraino hel zitezen. Taldeak “Gure jarrera” bigarren diskoaren edizio bitxi honetatik 5000 kopia saldu zituen Japonian.