Alex de la Iglesia zuzendari bilbotarrak aukeratutako kantuak “El día de la bestia” (1995) pelikularen osagarri izan ziren. De la Iglesiak Madrilgo zigiluaren katalogorik “deabruzkoenenean” arakatu, eta, lirikari eta musikari dagokienez, set-list basatia osatu zuen: Albert Pla, Extremoduro, Ktulu-ren lehen maketa, Soziedad Alkoholika eta bere “Feliz falsedad”, Eskorbuto mitikoak, Pantera, Ministry eta Def Con Dos, filmaren kanta nagusia kantatu zuen taldea. Bilboko zuzendariak Negu Gorriak ere aukeratu zuen, “akelarrea sortu zuen herrian jaioak”, berak diskoaren barruko oharretan esan zuenez. Hala, “Jainkoak gorde beza lehendakaria” lehengo aldiz CDan agertu zen.