Punk-funk musikak ere harrapatu zituen Kaki eta bere taldekideak 80. hamarkada hasieran…ez zen ba guztia punk-rocka izango, ezta? Erreparatu hasierako ahotsari.
Festa gogoz dantza egin nahi duen Joseph Bowie handiak Negu Gorriaken bigarren albumean parte hartu zuen, gure jarrerarekin bat zetorrelako. Nola bestela?
Nork ez du ba kanta hau ezagutzen? Negu Gorriaken kanta ezagunena izango da ziurrenik Gora Herria, oraindik ere dozenaka berbenatan entzun daitekeena astebururo. Bertan entzun daitekeen “Para vencer al tirano y su guardia nacional…” oso entzuna badugu ere, oso gutxik jakingo dute bere jatorria Carlos Mejía Godoy nikaraguar abeslariaren Los Explosivos kantuan entzun daitekeela:
Eta hemen duzue Negu Gorriaken kantua, Gora Herria Maxi single-ean agertu zen bertsioan:
Sam Cooke eta Otis Redding artean koka genezakeen Arthur Conley handia ere ez zuen ahaztu Irungo boskoteak. Gorria zenentz ez dakigu, baina homosexuala zela bai; barkamenik gabeko bekatu horren ondorioz, Herbehereetan eman zituen bere azken urteak; bere sorterritik urrun. Luis Mariano beltz honen “People sure act funny” kantaren intro dekadenteari adi!
Jendeak era barregarrian ziurki jokatu ala ez, 17. segundoan topa dezakegun sample hau Reixaren «refrito»a maisuki erdibitzeko gai da.
Aretha Franklinek ere amodio eta gorrotozko kantak zeuzkan, bizitza horrelakoxea baita. Kasu honetan adibide amoltsu batekin gatoz:
Xabier Lete, Mikel Laboa edota Antón Reixarekin batera geratu zen kokatua hainbat hamarkada beranduago:
1984. urtea; Zaramak “Indarrez” diska atera zuen orduan eta bertan kanta hau zegoen:
Hain juxtu ere, 7 urte geroago “Euskal Herri nerea”n Antón Reixaren lehen hizketaldiaren atzean entzuten dugun kitarra hots berbera:
Beste behin ere, Toni Estebani eskerrak! Portatu da gero…
De La Soul tarteka sampleatu behar izan du Negu Gorriak taldeak. Ez zaigu kasualitatea iruditzen, talde amerikarrak dauzkan doinu goxoekin maitemintzea oso erraza baita, duela hamarkada batzuk zen bezalaxe…
Jatorrizko kantan, Milliek Santa Klaus begipuntuaren xedean eduki zuenekoa kontatzen digute New Yorkekoek… Hasierako erritmoa ongi gorde gogoan, errimetan murgildu aurretik.
Erritmo hori zertxobait motelduz Begirunearen sarrera eta irteera bilakatu zen, argitaratu zenetik 4 urtera. Orain galdera hauxe da: Marcos azpikomandanteari ze irudituko zitzaion Santari bala bat sartzea?
Kasu honetan, sanpleatua izan zen kantaren izenburu berbera du NG abestiak. Lotura Xabier Leterengan topatu behar dugu:
Xabierren hasierako hitzek leku nola hartzen duten entzun nahi? Ados:
Negu Gorriak taldearen “Euskal Herri nerea”n Xabier Letek eta Mikel Laboak topo egiten dute. Ikustagun bigarren artista mitiko honen puska sanpleatua zertan den orijinalki:
Aretha Franklinekin batera maitatzen entzun dezakegu NG bertsioan:
Kasu honetan, berdintsu hasten diren bi kantez gain, era beretsuan ere hasten diren bi album ditugu hizpide; izan ere, bietako lehen doinuak bikiak baitira. Goazen bada Parliament taldearen diskoko lehen pistarekin: