1 2 3 4  
 
 

 

 

 

 

 
 
   
  Mano
Negra
 
Tous coupables!


 
 
 
   
1995  
 
HITZ EGIN!
Berehala Negu Gorriak taldearen eta Esan Ozenki zigilu diskografikoaren aldeko elkartasun-kanpaina hasi zen. Kanpaina funtsezko hiru lerrotan garatu zen: adierazpen askatasunak jaso zuen erasoaren berri eman, taldearekin elkartasuna sentitzen zutenen artean ahalik eta atxikimendu gehien lortu, eta segurtasun-kutxa bat sortu epaiketa-prozesu garestiari eta balizko zigor ekonomikoari aurre egiteko.

Kanpainak babes ugari jaso zuen, leku guztietatik etorriak: zine zuzendariak, poetak, idazleak, musikariak, kolektiboak, eta era guztietako eragileak. Denek publiko egindako epaia arbuiatu zuten eta musika-taldearen eta zigilu diskografikoaren aldeko elkartasuna adierazi zuten. Auzia zabaltzeko ardura hartu zuten hainbat ekimenek. Italia, Euskal Herriaz gain jakina, oso sentibera izan zen euskaldunen kausaren alde: aldeko sinadurak batu, herrialdeko bederatzi irratitatik egindako programa berezia, “Hitz egin! Parla!” elkartasun diskoa, Bolzanoko Radio Tandemek babestua 1996ko otsailean argitaratua eta Italiako hainbat talde batu zuena.

Kanpainak une gorenak izan zituen: bitxikeriaz, erremixez eta argitaratu gabeko kantuez osatutako “Ustelkeria” (Esan Ozenki, 1996) diskoaren serie zenbakitua eta mugatua, prezio solidarioan postaz saldu zena, kanpainarena aldeko fondorako, batetik, eta garrantzitsuagoa, Hitz Egin! Jaialdia Oiartzunen, 1995eko urriaren 28an ospatu zena, bestetik. Bertan hitzordua izan zuten poesiak, elkartasunak eta musika ugarik. Bederatzi orduz eta 12000 pertsonaren aurrean, eszenatoki bitan Esan Ozenkiko talde guztiak agertu ziren. Jaialdiaren amaieran hunkiturik Negu Gorriak taldeak zuzeneko bizienetarikoa jo zuen.
 
   
1996  
 
Maiatzak beste albiste bat ekarri zuen epaiketaren inguruan. Espainian oztopo askoren ostean, GAL auziak leher egin zuen (mertzenarioekin eta gobernuko goi-agintariekin lotura zuten elementu polizialak ziren, euskal disidentziaren aurka estatu-terrorismoan lan egin zutenak). 1995ean, PSOE agintean zegoela, ordurako ospea galdua zuen Enrique Rodríguez Galindo mailaz igo zuten, eta Jeneral egin.
1996ko maiatzaren 24an, kartzelan sartzeko agindua jaso zuen, Joxi Lasa eta Josean Zabala bahitu, torturatu eta desagerraraztearen auziarekin lotuta. Handik urteetara Euskal Herritik mila kilometrora aurkitu zituzten gazteak kare bizian lurperatuak.

Galindo 1996ko abuztuan berriro ere kartzelatik irten zen arren, Estatu Espainiarreko sektorerik erreakzionarioetarako heroi nazionala izan zen, baina artean ukituta zegoen. Auzi horren epaiketa hasi zen azkenean 1999ko abenduaren 13an, eta epaiketa prozesu neketsuaren ondoren Galindo zigortu zuten 2000ko apirilean: 71 urte kartzelan. 2004an, maila militarrik gabe, PSOEko, berriro ere agintean, gobernuaren aginduz, gaixotasunagatik kartzelatik atera zuten, susmo eta zalantza itsaspean, gobernuaren erabakia zela-eta.
1996 arte atzera eginda, Galindo aulkian jesartzea ez da leku baten izeberg punta baino: Intxaurrondo. Kuartelaren izena esatearekin batera, milaka euskaldunen artean kezka sortzen duen lekua. Intxaurrondo. Narkotrafikoz, torturaz, kontrabandoz, lapurretaz, erailketaz akusatutako guardia zibilen taldea. Eta jeneralaren eta bere kuarteleko izugarrikeriaren aipatutako eta bestelako kapitulu ilunak.

Urria agurraren hilabetea izan zen. Negu Gorriak desegin zuten. Atzean, jardun biziko zazpi urte, zazpi urte musika onarekin. Taldeak momenturik onenean utzi zuen, Kortatu desegin zutenean Muguruzatarrek erabilitako filosofiarekin bat eginik. Horrela amaitu zen mende honetako Euskal Herriko rock talderik enblematikoena. Baina adierazpen askatasunaren aldeko borrokaren lubakia ez zen hutsik geratu. Epaiketa prozesuak aurrera jarraitu zuen eta azken epea ere agortu nahi izan zuten. Agur esan zutenean, agindua airean geratu zen: Galindo auzia irabaziz gero, behar bezala ospatu beharrekoa.