negugorriak.net
             
 





[+ berriak]
08/03/25 Sagarroi
Sagarnota: berriak sagarroien planetatik





























 
Zenbat gauza aldatu diren 2001ean lehen aldiz oholtza baten gainera igo ginenetik!. Onerako beti ere, jakina. Hirukotetik boskotera. Bizirik dena beti etengabeko mugimenduan da. Proiektuak burutu ahala bide berriak begiztatzen ditugu, ilusioz, gogoz, indarrez egunerokotasunean.

Zazpi urteko arrastoa dugu atzetik, lau diska (Meatzaldea 2001, Euria ari duela 2003, Toulouse 2004, Baleike 2006),Antzerkiola Imagionarioa eta PCs de Colores taldeekin elkarlanean antzezlan musikatu bat (Ezekiel) eta atzerrian (Suitza, Serbia, Kroazia, Alemania, Cuba, Italia, Japonia, Frantzia, Espainia) nahiz etxean, hainbat bira eta kontzertu dira emaniko fruituetako batzuk. Agian egiatik hurbilako legoke orain arteko bidean harturiko fruituak direla esatea. Eginiko lan bakoitzak jarritako ahalegina mila eratara bueltatzen baitu beti.

2007. urtea orain arteko bidelagun, taldekide eta betirako adizkide izango den Gorka-ren agur urtea izan da. Bereak dituen arrazoiak direla medio zazpi urteren ondoren, abuztuan taldea uztea erabaki baitzuen. Asko da berak taldeari emandakoa eta handia utzitako hutsunea. Zorterik hoberena berarentzat!

Baina -badakizue- bizirik den oro beti da etengabeko mugimenduan. Abuztutik eta urtea bukatu arte eman ditugun 14 kontzertutan, Iban Zugarramurdi izan dugu baterian bidelagun. Plazer handia izan da, Iban, mila esker. Zorterik hoberena zuei ere zuen proiektu berrian: Aupa Esne Beltza.

Oraindik gazte den 2008 hau berriz taldekide berriaren urtea da, ilusio berriztatuz, gogo indartuz eta ideia berrien leherketez hasi duguna. Bateria eta sagarroi berria Iban Larrebouru Hendaiar gaztea dugu. Apiriletik aitzinera zuzenean gurekin izango da, eta furgonetan, eta biretan, eta parretan, eta eztabaidetan… Ongi etorri, Iban.

Baina bizirik den oro beti da etengabeko mugimenduan. Beti izan gara “ezin soseau” jendeak osaturiko taldea. Eta urte hasieratik honera, taldekide berria prestatu bitartean ixilik gaudela ematen badu ere, taldekide bakoitzak proiektu pertsonalak aurrera eramateko probeztu du. Honako hauek hain zuzen ere:

Mirenek Trahumantes konpainiarekin batera monologo bat prestatu eta taulatu du, “Crónica de una noche abierta”. Emanaldi pila ari da ematen eta aktorea bezala “Escena siglo XXI” ren berrikuntza saria jaso du lan honengatik.

Iñigo otsaila honetan aita izan da berriz, bere bigarren alaba Iraia-ren jaiotza izan dugu urteko berririk hoberena dudarik gabe. Honetaz gain Sagarroiren disko berrirako abestiak prestatzen dihardu eta gehiago argitu ezin dugun arren esan, abestiak ez diren beste zerbait ere idazten eta prestatzen ari da.

Asierrek ere hainbat alor batzen ditu bere baitan. Besteak beste Ander Lipus aktore eta zuzendariaren lan berrirako, “Hala mintzatu zen zappratusta”, musika sortu eta grabatu du. Gainera antzezlanean taula gainetik zuzenean sortzen du musika.

Eta nork daki Ondarruko alde zaharrean duen estudioan gertatzen denaren berri. Pintzel, lientzo, magnetofono, grabazioko estudio mugikor eta hainbat instrumentuen artean.

Karlos-ek ere teknologiak emaniko aurrerapen eta erraztasunak bere eginez grabazio estudio txiki bat prestatzen dihardu bere etxean bertan. Abestiak sortu eta grabatzen, soinuaren alkimista, sortzen, jolasten, ikasten. Nork daki, agian, zergatik ez, akustikoa izango den disko berriaren habia prestatzen.

Horrela ba, honetantxe gaude oraintxe bertan. Iban taldekide berriarekin entsaiguak egiten. Apirilerako zuzenekoa prestatzen, gogotsu eta eszenatokietara saltatzeko desiratzen. Jarraian ematen dizuegu zehaztatuak ditugun kontzertuen berri. Zuzenean ikusten gara, besarkada bat.

- Hurrengo kontzartuak:

04/19 Gatika. + Esne Beltza
05/25 Astigarraga. + Etsaiak

Loturak :
- Sagarroi
- Sagarroi [MySpace]